Ziur aski "barku jokoa" ezagutzen duzu. Marra itzazu lerro horizontal eta bertikalak elkarrekin gurutzatuz. Lerro bertikalen gainean jar itzazu hizki batzuk eta horizontalen ezkerrean zenbakiak. Horrela, karratu bakoitzean zenbaki eta hizki batez, untzi bat ondo mugatuta izango dugu.

Gizakiek ere antzeko sistema sortu dute Lur gaineko edozein puntu lekutzeko. Horretarako Lurrean ere, irudimenezko lerroak marratu dituzte, elkarrekin gurutzatuz: batzuk bertikalak eta besteak horizontalak: paraleloak eta meridianoak.

Paraleloak Lurra gerriko edo uztai batek bezala inguratzen duten irudimenezko lerroak dira. Denek ez dute luzera bera, noski. Erdi-erdian dagoena izango da handiena eta poloetara hurbiltzen joaten garen neurrian, txikiagoak izango dira.

Paralelo handiena Ekuador da, honek Lurra bi hemisferiotan banatzen du: Ipar hemisferioa eta  Hego hemisferioa.

Meridianoak poloetatik pasatzen diren irudimenezko lerroak dira, guztiek neurri bera daukate.

Neurketarako garrantzitsuena 0º meridianoa da. Greenwich meridianoa ere deitzen zaio, hiri ingeles horretatik pasatzen delako.
Meridiano honetatik ekialdera edo mendebaldera zenbat gradu aldentzen diren, horrela zehazten dira leku guztiak.